'नाच रे मोरा' या गाण्यावर नाच करताना शेवटच्या कडव्यात 'निळ्या सौंगड्या नाच' अशी शब्द रचना आली.
बाबी: सौंगड्या म्हणजे काय जीजी?
जीजी: सौंगडी म्हणजे मित्र, मैत्रिणी.
बाबी: निळ्या सौंगड्या कोण?
जीजी: निळा सवंगडी म्हणजे मोर. मोर निळा असतो ना? आणि त्याच्याबरोबरच तर नाच चाललाय.
बाबी: माझा सौंगड्या लाल आहे (अजूनही सौंगड्या चे सवंगडी झाले नाहीच).
म्हणजे ती आज ज्या मोराबरोबर नाचतोय तो लाल दिसतोय. बाबींकडे निळे मोर ८-१० तरी असतील, पण आजचा सवंगडी लालच. असो.
त्या एका कवितेत किती बदल करावे लागणार आहेत देव जाणे! 😀😀
'देव जाणे' वरून आठवलं. हे गीत कविवर्य ग. दि. माडगूळकर यांनी 'देवबाप्पा' या सिनेमासाठी लिहिले, सिद्धहस्त संगीतकार श्री. पु. ल. देशपांडे यांनी त्यावर संगीताचा साज चढवला आणि स्वर्गीय आवाजाची देन असलेल्या आशाताईंनी ते आपल्या सुमधुर आवाजात गायले. 'देवबाप्पा' सिनेमा १९५३ मध्ये रिलीज झाला.
या सिनेमात काम करणारी छोटी मुलगी म्हणजे मेधा गुप्ते. मी इंटर सायन्ससाठी गोव्याच्या धेम्पे कॉलेजमध्ये शिकत असताना (१९६८-६९) ती MBBS करीत होती पण त्यांच्या मेडिकल कॉलेजचे हॉस्टेल नसल्यामुळे आमच्या कॉलेजच्या हॉस्टेलवर राहत होती. त्यामुळे ती माझी हॉस्टेलमेट.
बाबीमुळे या ५०-५२ वर्षांपूर्वीच्या आठवणी जाग्या झाल्या.
कोणत्याही टिप्पण्या नाहीत:
टिप्पणी पोस्ट करा